Adur Ezenarro alkate eta gobernu taldea, berria

GITB 2019ko eka. 17a, 10:05
Ikusmin handia eragin zuen Ordizian udal osaketak, udaletxeko batzar aretoa lepo bete arte. Batetik, agintearen kolore aldaketagatik, eta bestetik, azken legealdietan 13 zinegotzi izatetik 17 izatera igaro baita udalerria. Eta bai, hauteskundeen ondoren imagina zitekeena, bete egin da: Adur Ezenarro izendatu dute alkate Ordiziako Udalean. Alkatetza lortzeko gehiengo absolutua lortu behar da zinegotzien bozkekin, hau lortu ezean, zerrenda bozkatuena izateak salbatzen zaitu, bertako zerrendaburua izendatzen baita alkate. Alde horretatik EH Bilduko kideak lasai zeuden. Emaitzetan ez zen sorpresarik izan, EH Bilduko Adur Ezenarrok bederatzi boto jaso zituen, Jose Migel Santamariak zazpi eta bat zuria izan zen. Bozketaren emaitzarekin batera txalo zaparrada jaso zuen Ezenarrok. Berarekin batera, Maitane Alvarez, Jon Ander Caballero, Ainhoa Jimenez, Jesus Mari Lariz, Itsaso Muñoz eta Lander Mujika alderdikideek, Elkarrekin Podemoseko Mila Sukiak eta Juan Ignazio Alonsok, EAJko Jose Migel Santamariak, Arantxa Arozenak, Joseba Aranburuk, Xabier Crespok, Arantxa Fernandezek, Eritz Perlinesek eta Bittor Bolinagak eta PSE-EEko Iñaki Dubreuilek osatu zuten Ordiziako udalbatza berria. Hemendik aurrerako pausoez galdetzerakoan udal funtzionamendu aldaketa bat datorrela azaldu du Ezenarrok. Bestalde, herritarrentzat aldaketa gehiago ekarriko dituztela baieztatu du. Aginte makila trukatu zuten alkate eta alkate ohiak, eta bigarrenak zorte on opatzeaz gain, Ordiziaren alde lan egiteko prest jarraitzen dutela azaldu zion. Ezenarrok, bere aldetik, hunkiduraz beteriko eskerrak eman zizkien bere taldekideei baita bere familiari ere. Bestalde, Euskal presoak gogora ekartzeko unea ere hartu zuen.

Egin zaitez Komunitateko kide eta eman zure ekitaldien berri!

Argazkiak, artikuluak, hitzorduak, agenda ekitaldiak, eta bestelako edukiak gehitzeko aukera izango duzu webgunera.


KOMUNITATEA