Larunbatean, Lazkaoko San Prudentzio jaien baitan, LXXXI. Lazakoko txirrindularitza proba ospatu zen junior mailan.
Lasterketa osoan zehar Quesos Albeniz taldeko Iker Gomez altsasuarra nagusitu zen. Larraitz, Gaintza eta Lazkaomendiko mendateak lehenengo postuan igaro zituen, Aimar Quintana eta Iker Villarrek jarraituta, hurrenez hurren.
Lehen postuan mantenduz, 2h31'58 behar izan zituen ibilbide guztia osatzeko. Bigarren postuan, Viveros taldeko Beñat Sainzek (2h32'59) igaro zuen helmuga minutu bateko tartearekin. Segundu gutxira iritsi zen Invitec taldeko Aimar Quintana (2h33'16) arabarra hirugarren postuan, podiuma osatuz.
Proba irabazteaz gain, mendiko sailkapena irabazi zuen Gomezek. Taldekako sailkapenean berriz Viveros San Anton-Mardu taldeak atera zuen denbora onena.